RantauNet - Mailing List

mailing list

dancer

Thanks for sited and mailing list server to

SAMBUTAN / PANYAMBUIK

Assalamu'alaikum Warrahmatullahi Wabarakatuh,

Rang kampuang ambo...........nan piawai,
nan laku elok baso katuju,
Salamaik datang dirantaunet, 
masuak banalah ka lapau awakko,
didalam lah banyak rang awak,
ado  nan duduak-duduak malapeh angah,
malapeh panek maunjuakan kaki, 
ado nan mangolenseangkan sarawa bagai,
ado nan basarawa pintalun rancak,
ado pulo nan basarawa galembong,
nan jaleh sadonyo pakai sarawa.

Datuak, Rajo, Sidi, Sutan, Gindo jo manti-mantinyo,
nan indak bagala sampai nan "bergelar" ado disiko
baitu juo, disiko ado Bundo Kanduang jo mantinyo pulo,
nan samuik tapijak indak mati, alu tataruang patah tigo.
ado nan datang dari Eropa, Amrik jo Australia,
nan dari Asia usah ditanyo, banyak bana.
nan dari Afrika mudah-mudahan,
babaua rang rantau jo rang awak nan tingga diranah bundo
disiko dijalin silaturrahmi, padusi laki-laki sapo manyapo
baitu juo tampek kito badendang-dendang, 
badiskusi untuak kamajuan kampuang jo budaya kito, 
bapantun mangaji adaik bagai, pokoknyo "langkap" kecek Tan Baro
kok nak basilek babalabeh, baok sajo sarawa galembong surang-surang

Dek awak maota caro lapau, mako goreang pisang jo nasi katan,
nasi puluik jo lapek bugih, langkok jo godok bakubangnyo,
itulah kato palamak ota, karipik balado usah tinggakan
kok nak mambao kueh talam bagai, atau lapek ubi jo lamang tapai,
jambakan sajo katangah lapau

Bahaso nan awak pakai tasarah sajo,
ijankan caro Kurai, caro Kumpulan,  caro Pikumbuah, caro Piaman
atau caro Solok, caro Batusangka,
bahaso Nasional awakpun laku pulo, sairiang jo Inggirih atau Juraman
bahaso Arab maningkahi, kalau paralu bahaso samuik,
indak paduli bahaso asiang,
nan pantiang dimangarati dek rang lapau

Bukik Tinggi koto rang Agam, mandaki janjang ampek puluah,
Ampek Angkek manjalang Baso
Sakik sagadang bijo bayam, tapi bak raso kamambunuah
Masuak rantaunet sajuak rasonyo

ha, ... baa gak ti? Lai cocok mor nyo?
Disampiang tu, ado juo eloknyo kito sampai manyampaikan
bahaso awakko ado punyo Rantaunet Foundation 
nan sipaiknyo sukarela, hati nan rila kato kuncinyo
nan mamprogram sumbangan ka ranah bundo
aratinyo bagarah bagurau sambia mangana kampuang,
mako takana dek ambo pitaruah niniak awak,
nan satitiak kito lauikkan, nan sakapa kito gunuangkan,
kok kurang laweh tapak tangan, jo nyiru kito tampuangkan.
 
Pariaman di ari akaik, urang Tiku manggaleh ikan gurami,
Tabuik dihoyak sampai sanjo
Kampuang ilaman barilah barakaik, untuang batamu tanah tapi,
Tacapai juo nan dipinto

kito cubo sajoak lai, yo ndak?

Batusangka kota budaya, di Solok basimpang tigo,
Sitinjau lauik taruih ka Padang, handak manuju danau Maninjau
dirantau badan kok gawa, awak dikampuang baitu pulo,
rantaunet awakko masih lapang, tampek kito bagarah jo bagurau

rang Aia Bangih nak ka Painan, balayia dihari sanjo,
di Bunguih singgah malapeh angah, sambia maraguak karambia mudo
Jo tangih badan dilapeh bajalan, mancari ma'ana duniako,
diayun langkah mambaco bismillah, nan ranah bundo mangubik juo
Rila jo maaf panutuiknyo
(kok nak memperkenalkan diri salanjuiknyo, nak bacurito, 
nak bapantun, nak badiskusi, nak bapapatah-patitiah, 
atau nak manyumbang pitih bagai, silahkan)

Wassalamu'alaikum Warrahmatullahi Wabarakatuh,

Mas Eddy E Budisantoso, Ari Noviandi, Amzar Bandaro, Sjamsir Sjarif, Masdar Tan Galamainda, Budi Putra, Maifil Eka Putra

Acoklah dunsanak datang kamari, kok adolah mukasuik ka manjadi palanggan Balerong awak ko,
kirimkan kaba ka alamaik e-mail:

Daniel Yusuf daniel@geotech.pauir.itb.ac.id

[ Sign GuestBook ] - [ View GuestBook ]
[ GuestBook by TheGuestBook.com ]

Send mail to damix@email.com with questions or comments about this web site.Copyright � 1999 RantauNetLast modified: 19 June 1999

Send mail to damix@email.com with questions or comments about this web site.
Copyright � 1999 RantauNet
Last modified: 19 June 1999